حزيــنـه الـدار لفراگـچ ييمــه يل احنَيْنه علينه الفرگه ظلمه

حزيــنـه الـدار لفراگـچ ييمــه
يل احنَيْنه علينه الفرگه ظلمه


حزيــنه الـدار لفراگ الحنينـه
طفـت شمعتنه ياعالـم علينـه
بعـد عينچ بقت دارچ حزينـه
صبَحَت يايمه بغيابچ مظلمه


يخيمـه انتي علينه اتلم شملنه
يشع نورچ مثل طلعَت گمـرنـه
يـمحلــه ايـام امـي كلهه جنـّـه
أيا نبـع الحنان من الله رحمه


نبـع تنبض مَحَـنَّـه بعـد عمـري
تحت جدمچ حنان انهار تجري
ينـاس افراگ امـي كسر ظهري
ويعين الله على الّي فاگد امه


يـمحلـه ايام چِنَّه نگعد اوياچ
نسمع هلـه يمـه وحلـو ملگاچ
حرگ گلبـي ييمـه نـار فرگـاچ
تــرك بحشـاي والدلال لچمـه


رسمت اسمچ ييمه ابوسط گلبي
لأن انتـي حيـاتـي ونــور دربــي
شمــا اذكـر رَسِمتَـه ايزيـد حبـي
حــرف منّـه يعالـم چنَّـه نسمــه


سمعت الناس جابو طاري اسمچ
ذكرت اسمـچ ييمـه مـن رِسَمتِچ
بـچـت عينـي عليچ وكُون يمـچ
أقبّـِـل راســچ وجدمــچ أشمَّـــه


حـزيــن آنـي عليهَه ابشوگ حنّيت
وعلـى فـراگـچ ييمه الدمـع هَلـِّيت
سگـف چانت علينـه وشمعة البيت
طفت شمعتنه صارت كلهه ظلمـه


طفـت شمعتـنـه ياعالـم علينـه
عگـب فـرگ العزيـزه والحنينـه
ينــاس افـراگ امـي مـو بدينـه
أمــر الله الكريـم البـاقي اسمـه


امـر الله الكريــم العـالي شانـه
بكـاف ونون امـر الله سبحانـه
سألت البـاري يجمعهه ابجِنانه
معَ طـه النبي صاحب الرحمـه


ختـام الشعـر اهديهـه صلاتـي
على طـه النبي حلوه الصفاتي
عدي ينظـم قصيـده ولابياتـي
ويصلي عالحبيب الحلو اسمـه
الشاعر عدي ابو مصطفى