هايم بحب النبي والعشك جنني لحد يلوم الجذع للهادي من حني

هايم بحب النبي والعشك جنني
لحد يلوم الجذع للهادي من حني

هايم بحب النبي والروح مجذوبه
والگلب مني هتف بذكر محبوبه
اشهد يربي ايقنت القسمه مكتوبه
اقسملي من خشيتك يربي وارحمني

سهران ليلي اعن وبگلبي حسراته
باني خيام الحزن يبچي على الفاته
كضت ايام العمر وانتهت حسباته
والراس مني اشتعل والشيب وسمني

منايه طول العمر بس اوصل الكعبه
وشوف ذاك الحرم واتشرف بقربه
وازور روض النبي والزم العتبه
والهم ثرى تربته وارجاه يقبلني

مشتاك للهاشمي والشوك ايزيدي
تزور قبر النبي يفرحتي وعيدي
الله يمحلى العشك يناس موبيدي
حب النبي يخلك هو الي كاتلني

حب النبي من زغر معجون بلروحي
هو صميم الگلب وبلسم للجروحي
عاشق جمال النبي معذور لو سوحي
وانحر لطيبه مشي واروح متعني

محلى جمال النبي الاوسط القامه
احمد مليح الوجه ومحلاه العمامه
كلمن رأهو اظن في حبه هامه
والي يطيع النبي ايعيش متهني

ختام كل الرسل طه النبي الغالي
شفيع النا غدا في يوم الاهوالي
دين السماحه جلب باقي ولا زالي
رسول كل الخلق من ناسه وجني

يربي بلمصطفى اغفر لي اذنوبي
ولمي ولبوي وهلي ولكلي محبوبي
الطف الهي غداً لو جاني مكتوبي
انت الرحيم السمح وهذا حسن ظني

لله كل الفضل والشكر والمنه
الباعث المصطفى برحمته النه
محلى اخلاق النبي والشرع والسنه
محلاه شيخي الذي عصدق علمني

الف الصلاة والف سلام وياه
بعبير طيب المسك لسيدي طه
غانم الرزيج كتب وبحبك اتباه
ارجو الشفاعه اذا اعمالي خذلني